BJP leh IPFT intihbuai chhan CPI(M) : IPFT General Secy

Tripura-ah hmun ṭhenkhatah Thawhṭanni khan buaina nasa tak a chhuak leh a, Indigenous People's Front of Tripura (IPFT)-ten an party tualchhung hotu Mangal Debbarma man a nih avangin IPFT-te hian kawng an dang a, buaina a chhuak zui a ni.

IPFT hian Gabardi, Telarban, Kanchanmala leh Golaghati hmun ṭhenkhatahah kawng hi an dang a, BJP MLA in Golaghati leh BJP office beihnaa mawhphurtua puh IPFT hruaitu Debbarma man a nih avang hian an lungawi lo hle a ni. IPFT activist leh thlawptu mi 100 chuangin hmun tarlan hrang hrangah hian kawngpui hi an dang a, zan rei tak thleng an dang a, Police-te hian Thawhṭanni zanrei tawhah khan Mangal Debbarma hi an chhuah tih an hriat hnuah kawngpui an dan hi an titawp chauh a ni.

Hetihlai hian IPFT General Secretary, Shukla Charan Noatia chuan BJP leh IPFT inkara buaina chhuak reng rengah chuan CPI(M) chauh puhmawh tur an awm thu a sawi a, BJP leh IPFT chuan an buaina an chingfel tawh tih a sawi.

BJP hruaitu beihnaah hian IPFT activist in­hnamhnawih an awm lo tih a sawi a, mahse police-te chuan an party hruaitu pakhat chu man mah se an chhuah leh tawh tih a sawi. BJP leh IPFT chuan an inhriatthiam lohna zawng zawng chu an chinfel tawh thu sawiin an inkara buaina chhuak tawh zawng zawng chu CPI(M) tihchhuah vek a nih thu a sawi a ni.