Manipur-a mi sawisak hlum case-ah police panga suspend

Manipur-a West Imphal huamchhunga Tharoijam area-a mi pakhat kum 26 mi sawisak rawn case-ah police panga suspend an ni.

He insawisakna hi kar kalta Ninagni-a thleng kha niin mipui­in an sawisak rawn hi Thoubal district mi Farooque Khan a ni a, sawisak a nih hnu hian a hliam tuar lo in a thi zui a ni.

Khan sawisak rawn a nih lai video hi a darh nasa hle a, video aṭang hian sawisak a nih lai hi police-te pawhin an hmu reng tih a lang a, police-te hian chhan an tum lo a, engmah tih an tum lo tih a lang bawk.

Khan leh a ṭhiante pahnih hi car rukhmang nia puh an nih avang hian mipuiin an sawisak rawn a, Khan-a ṭhiante pahnih erawh chu an tlanchhe hman a ni.

He buaina kaihhnawihah hian mi panga man an ni tawh a, India Reserve Battalion (IRB) police force constable pakhat a tel bawk.

He thil thleng hi nasa taka sawisel a ni a, Manipur Human Rights Commission chuan DGP chu he thil thleng chhuichiang tur hian an nawr a, September 22-ah chuan report tichhuak hman tura an beisei thu an sawi.

Chief Minister N. Biren Singh pawhin rang taka thil thlen dan chhuichiang turin thupek a lo tichhuak tawh bawk a ni.

Police suspend zingah hian sub-inspector pawh a tel nghe nghe.

He case chhui chiang tur hian State Home Department chuan Imphal West Additional Superin­tendent of Police S Hamenta Singh kaihhruaina hnuaiah Sepecial Ivestigation Team an din tawh thu an sawi bawk.