Manipur inthlan tura BJP candidate siamah lungawi lo

Manipur assembly inthlan neih tur atana party canidafte list chu Pathianni khan BJP chuan a tichhuak a, candidate list-ah hian BJP MLA nilai pathum telh an nih loh avangin party mi leh sa an lungawi lo a, state chhung hmun hrang hranga party office-te an bei.

BJP candidate list-ah hian tun hnaia Congress party hruaitu hlui 10, BJP zawm tharte chu telh an ni a, hetih lai hian BJP MLA ṭanglai pathum erawh paih an ni thung. Candidate list-a tel lo, BJP MLA pathumte chu P Saratchandra Singh (Moirang), M Rameshwar Singh (Kakching) lehY Erabot Singh (Wangkhei) te an ni. An aiah hian Congress aṭanga inlet, MLA hlui M Prithiviraj, Yengkhom Surchandra Singh leh Okram Henry Singh-te dah an ni thung. Henry hi Congress hruaitu hlun, chief minister hlui Okram Ibobi Singh tupa a ni.

Party MLA-te aia an party zawm tharte candidate-a dah an nih avangin BJP member-te an lungawi lo a, state chhung hmun hrang hranga party office-te an beih bakah, prime minister Narendra Modi leh chief minister N Biren Singh limte an hal. Party member-ten lungawi lohna an lantir avangin Imphal-a BJP headquarters-ah pawh venhimna tihkhauh nghal a ni.

BJP hruaitu, party ticket chan inbeisei, mahse chang pha ta lo eng emaw zatin banna an thehlut tawh nia sawi a ni. Party hruaitu tam zawk chu Congress aṭanga inpete candidate-a dah an nih avangin an lungawi lo hle bawk.

Assembly seat 60-a inthlan neih turah hian BJP chuan chuh kim vek a tum a ni. Kum 2017 inthlanah khan BJP hian seat 21 lain, party tenau leh independent MLA-te puihnain sorkarna a siam a ni.

BJP candidate list tihchhuahah hian hmeichhia pathum leh Muslim candidate pakhat an tel. Hmeichhe candidate turte hi Nemcham Kipgen, SS Olish leh Soraism Kebi Devi-te an ni a, IAS officer hlui pathum an awm bawk.

BJP Manipur election in-charge Bhupendra Yadav chuan inthlanah hian BJP chu party mala sorkarna siam thei turin an chak ngei dawn niin a sawi.