Shillong-ah bomb a puak

Meghalaya khawpui, Shillong-ah Pathianni zan khan Police Bazar-a wine shop bulah bomb a puak a, thil tihchhiat lian tham erawh a nei lo.

Home minister Lahkmen Rymbui chuan bomb hi zan dar 6:30 vela puak a nih thu sawiin,a tipuaktu nia rinhlelh pawh hriat a nih thu a sawi. He pawikhawihnaa inhnamhnawih dangte chu police-ten an man thuai dawn tih sawiin, boruak muanawm tichhe thei zawnga pawikhawihna thleng hi a dem thu a sawi.

East Khasi Hills SP Sylvester Nongtnger pawhin bomb squad ten an endik nghal thu sawiin, pawikhawihna thlenna hmunah hian police-ten gelatine leh wire an hmu tih a sawi.

Chief minister Conrad K Sangma pawhin Police Bazar-a bomb tihpuah a ni chu a dem thu sawiin, "He thil hi mi dawihzep thiltih, boruak muanawm tihchhiat leh midangte tihnat tumna a ni. Pawikhawihtute chu zawnchhuah vek an ni dawn a, sorkar chuan state chhunga boruak ṭha leh muanawm a awmna turin theihtawp a chhuah zel dawn a ni," a ti.

Pathiannia bomb puak hi thla ruk chhunga state chhunga bomb tihpuah a nih ṭum thumna a ni. Nikum July 14 khan East Jaintia Hills-a Khliehriat-a police campus-ah IED tihpuah a ni a, police pakhatin hliam a tuar. August 10 khan Shillong-a Laitumkhrah Market-ah bomb tihpuah a lo ni tawh bawk. Heng bomb puak pahnihte hi Hynniewtrep National Liberation Council chuan an tih niin an chhal. He pawl vek hian October 4 khan National People's Party office pawnah crude bomb an lo kam tawh bawk a, mahse bomb hi puak loin vice president M Venkaiah Naidu-a'n Shillong a tlawh laiin hmuh chhuah a ni.