Tripura-a zirna inte hawng ṭan

Tripura sorkar chuan hri leng vanga hun eng emaw chen zirna in a khar hnuah, nimin aṭang khan school, college leh university-te a hawng leh ṭan ta.

Education minister Ratan Lal Nath chuan state health leh education department director-te nena an sawiho hnuah, zirna in hawn hi an rel tih a sawi. Pre-primary aṭanga higher secondary school, college leh university-te chu an kal leh ṭan a ni.

Minister chuan hri leng vanga kum hnih chhung hun tam zawk zirna in khar a nih avangin zirlaite pawhin an zirna kawngah an tuar phah hle tih a sawi. 'UNICEF pawhin zirna in khar reng chu hawn aiin a hlauhawm leh nghawng a nei pawi thei zawk dawn niin a lo sawi. World Bank pawhin zirlaite chuan an zirna kawngah mai ni lo, an rilru lam thlengin an tuar a ni," a ti.

Zirna in te hi hawn ni mah se, Covid-19 kaihhruaina dan chu khauh taka kenkawh vek a ni dawn tih minister chuan a sawi.