Manipur police ten a huhoa tharum thawhna duh lohna kawngzawng nei

Manipur police-te chuan Thawhṭanni khan Indo-Myanmar border-a Moreh leh Tengnoupal inkarah state chhunga a huhoa tharum thawhna thleng thin (mob violence) duh lohna lantirin kawng an zawh.

Police kawngzawh hi 70 vel an ni a, uniform ha chungin kawng hi an zawh a, Tengnoupal Superintendent of Police S Ibombcha Singh chuan hma hruaiin civil body hrang hrang aṭangin volunteer 500 velin an zawm bawk a ni.

Ibombcha Singh chuan Moreh police station aṭanga Tengnoupal district headquarters thleng ralmuang takin kawng an zawh thu a sawi a, km 2-a thui kawng an zawh chu dan leh thupek zawm pawimawhna an auchhuahpuina a nih thu a sawi.

Kawngzawhnaa tel zinga mi pawhin kawng an zawh chu boruak muanawm tak hnuaia zawh a nih thu leh thil thleng ngai lo a nih avangin a dangdai hle tih a sawi ve bawk.

Manipur-ah hian a huhoa tharum thawhna a thleng zeuh zeuh a, kar liamta Ningani lawk pawh khan mi pakhat kum 26 mi chu car ruk hmanga puh a nih avangin Imphal West district-a Tharoijam area-ah an sawisa hlum a ni.

He thil thleng chhuichiang tur hian SIT pawh din an ni tawh nghe nghe a, mi panga man ni tawhin an man zingah hian India Reserve Battalion havildar pawh a tel. Mipuiin mi an sawisak rawn lai video hi social media lamah thehdarh a ni a, video aṭang hian insawisakna thlen lai hian a bul hnaiah police te pawh an awm reng tih a lang a, police-te hian chhan an tum loh avang hian police panga suspend an ni bawk a, heng zingah hian Sub Inspector pakhat a tel nghe nghe a ni.