Tripura-ah Journalist beih vangin mi pathum man

Tripura-a West Tripura district-ah police-te chuan tualchhung journalist beih vangin Nilaini khan mi pathum an man.

An mi man te hi Prasenjit Saha, Tanmoy Deb leh Narayan Debnath, New Capital Complex police station huamchhunga awm Indranagar-a cheng te vek an nih thu Police-te chuan an sawi.

An mi man te hian kar hmasa Nilaini khan Kive 24 television journalist, Subhankar Majumder (30) chu Indranagar hmunah hian an bei niin an sawi a, an journalist beih hi Indranagar mi tho a nih thu sawiin misualin an bei tih hriat a nih velah hian Majumder-a nu hian ṭanpui turin an beihna hmun hi a pan nghal tih an sawi. A nu pawh hian hliam a tawrh phah tih an sawi nghe nghe bawk.

Journalist leh a nu hi Indira Gandhi Memorial (IGM) Hospital-ah hruai nghal an ni a, a hnuah Trauma Care Centre at Gobind Ballabh Pant (GBP) Hospital sawn lehin hemi hnu hian FIR pawh thehluh a ni ta a ni.

Majumdaar chuan September 12-a a ina chawchhun ei tura a haw chu auto-rickshaw driver-in a in a zunkhum a hmuh thu a sawi a, driver chu hauin hemi hnu lawkah hian driver leh a ṭhiante pahnih chuan an bei zui ta mai niin a sawi a, a lu-ah rod in an vua tih a sawi bawk. Journalist a nih thu a sawi pawhin engahmah an ngaih loh thu leh an sawisak chhunzawm zel thu a sawi bawk.

Live 24 bureau chief Subhash Das chuan an journalist beih a ni chu a dem thu sawiin, Subhankar hi journalist ṭha tak a ni a, journalist a ni tih a sawi chung pawha kut an thlak lui zel chu a dem thu leh a sawisa tute chuan hremna na tak hmu ngei se a duh thu a sawi.