Nagaland Assembly-in Naga buaina chingfel turin sorkar laipui a ngen

Nagaland Assembly chuan Ningani khan resolution siamin Naga politics buaina chinfelna mumal tak leh pawmawm tak siam turin sorkar laipui an ngen thu an tarlang.

Resolution an siamah hian MLA 60-te chuan Indo-Naga political issue chu kum 70 chuang zet chinfel lohin a awm tawh thu leh inbiakna pawh kum 21 vel zet kalpui a nih tawh thu an tarlang a, hemi anih avang hian sorkar laipui chuan inremna tluantling, zahawm tak leh pawmawm tak, mi zawng zawng huam si siam se an duh thu an tarlang a ni.

People’s Democratic Alliance (PDA) sorkar hruaitu lu ber, Chief Minister Neiphiu Rio chuan Naga buaina chinfelna kawnga inbiakna kal mekah an sorkar chu palaiah an ṭan hreh loh thu leh Naga mipuite dikna chanvo chan tur chu hmuh ngei a nih theih nan an beih zel tur thu a sawi.

Rio chuan hunrei tak chhung an tawrh tawh thu sawiin, kum 70 chuang chhungin kum 21 chhung, 1997 aṭang khan inbiakna an neih tawh thu leh Framework Agreement an ziah aṭang pawhin kum thum a ral leh tawh thu a sawi a, hetaṭang hian mipuite duh ber leh beisei chu a chiang reng tawh tih a sawi. Politics thilah an duhdan inang lo te awm bawk ṭhin mah se Naga mipuite chu buaina chinfel kawngah chuan an inlungrual hle niin a sawi a ni.