MU buaina: Police-ten zirlai 90 leh faculty member 5 man

Manipur University buaina chuan ziaawm lam a la pan thei lo a, kar kalta Ningani zanlaiah khan buaina nasa tak chhuak lehin tualchhung chanchinbu-te chuan Police-ten zirlai 90 vel leh faculty member panga vel an man niin an tarlang.

Tualchhung chanchinbu-te chuan kar kalta Ningani tlaiah khan vice-chancellor AP Pandey-an Pro Vice-Chancellor atana a ruat Y Yugindro Singh chuan University chhung a luh hnuah buaina hi a chhuak niin an tarlang a ni.

Ningani zanlaiah hian armed vehicle 30 vel campus-ah hian an tlanlut nia tarlan a ni a, zirlaite chu kutthlak an nih bakah tear gas leh rubber bullet te pawn hman a nih thu tarlan a ni bawk.

Y Yugindro Singh hian Vice Chancellor charge hi a la tawh nia tarlan a ni a, vice-chancellor AP Pandey chu tiam chin awm loin HRD Ministry in an lo suspend tawh bawk a ni.