Assam Police-ten /halai state pawna hnathawk database siam dawn: DGP

Assam Director Gene­ral of Police Kuladhar Saikia chuan Inrinni khan state police-te chuan an state ṭhalai state pawna hnathawka awm te data­base an siam dawn thu sawiin hemi hmang hian an awmdan an enfiah thei dawn niin a sawi.

DGP chuan Kanpur-a Hizbul Mujahideen firfiak Qamar uz Zaman man a nih aṭang khan hetianga hma lak hi a ṭul hle niin a sawi a, Qamar uz Zaman man a nih hnu hian Hizbul Mujahideen firfiak pawl nena inzawmna nei mi pasarih Assam chhungah man an ni bawk a ni.

Saikia chuan state chhunga thingtlang khaw tina village headmen-te chu an ṭhalai, state pawna hnathawka awm te information lakhawm tura an hriattir thu a sawi a, heng an thu lakkhawm te hi an dahkhawm dawn thu sawiin data lakkhawm hmang hian an ṭhalaite khawsak dan chu awlsam takin an hre thei dawn tih a sawi.

Special DGP, Assam, Pallab Bhattacharyya chuan Hizbul pawl chu Assam-ah a rukin a darh mek tih a sawi ve bawk a, Jamat Ul Mujahideen, Bangladesh (JMB) leh Harkat-Ul Mujahideen-te pawhin nasa takin bu khuar an tum reng thu sawiin Assam mipui ten an pawm loh avangin bu an khuar thei lo niin a sawi bawk.

National Investigation Agency (NIA)-te chuan kar hmasa lawk khan Assam hi lo thlengin Hizbul Mujahideen firfiak nena inzawmna nei mi pasarih an man te an chhuichiang a ni.