Manipur BJP MLA 2-in Congress party zawm

Manipur assembly inthlan neih tura BJP ticket chang ve ta lo, BJP MLA pahnih chuan an party chhuahsanin Congress party an zawm.

Pathianni khan BJP hian inthlan neih tura party candidate list a tichhuak a, hetah hian BJP MLA nilai pali an tel lo a, tun hnaia Congress party aṭanga BJP zawm 10 zet telh an ni thung. Hei vang hian BJP hruaitu leh member-te an lungawi lo hle a, state chhunga BJP office hrang hrangte pawh an lo bei tawh a ni.

Moriang bialtu, BJP MLA P Sarat Chandra Singh chuan BJP a chhuahsan thu a sawi hnuah nimin khan Congress party a zawm a, amah thlawptu mi eng emaw zatin an zui bawk. Minister hlui, Sekami bialtu Ningthoujam Biren bakah BJP hruaitu Ningthoujam Joykumar Singh pawhin Congress hi an zawm bawk.

Congress party chuan BJP hruaitu 12 dangten an be mek tih an sawi bawk a ni.

BJP MLA zingah National People's Party (NPP) zawm tum pawh eng emaw zat an awm nia sawi a ni a, ni hnih khat hnuah an tihfel rin a ni. An zingah hian BJP ticket chang lo, MLA nilai pahnih - Y Erabot Singh leh Rameshwar pawh an tel.

Nimin khan Manipur chief minister N Biren Singh chuan an party candidate tur, mi 60-te chu meeting a neihpui. He hunah hian Assam cabinet minister leh BJP election in-charge of Manipur Ashok Singhal, state BJP president A Sarda Devi leh minister Biswajit Singh-te an tel a ni.