Assam-ah hri kai pung thar leh Offline class erawh kal thuai theih beisei

Assam state-ah ni li chhung Covid-19 hri kai tharin tlakhniam lam an pan hnuah, Thawhṭanni khan an pung leh a, hri kai hmuh chhuah thar mi 1,811 an awm belh leh.

National Health Mission (NHM) chuan Assam-a hri kai hmuh chhuah tawh hi Thawhṭanni thleng khan 7,16,406 an tling tawh tih a sawi. Hripui vanga thi hi mi1,347 an awm tawh bawk.

Hri kai pung leh mah se, chief minister Himanta Biswa Sarma chuan hri leng vanga zirna in hrang hrang kharte chu February 15-ah chuan tihtawp a, offline class neih theih tawh an beisei tih a sawi.

January 7 khan state sorkar chuan January thla chhung atan sorkar leh private school-ah Class 5 chin chu a khar tir, Kamrup Metro district-ah Class 8 thleng khar an ni bawk. Hemi chhung hian online class erawh kalpui reng a ni thung.

Dhemaji-a chan­chinbu mite a kawmnaah, Chief Minister chuan an state-a hri leng dinhmun chu uluk taka zirchian reng a nih thu sawiin, ziaawm lam an pan theih zel chuan February 15-ah zirna inte hawn theih beisei a ni, a ti. Hei bakah ni khata hri kai thar 1,000 hnuai lam an nih hnuah zan lam curfew pawh thlahdulin, zan dar 11 aṭangin curfew ṭan a nih tur thu a sawi bawk. Tunah hian zan dar 10 aṭanga a tuk zing dar 6 thleng curfew a ni a, dawr leh sumdawnna hmunte chu zan dar 9-ah inkhar vek tura tih an ni.

CM Sarma chuan state chhunga zirlai, kum 15-18 inkar nuai 9 velin Covid-19 vaccine an la tawh tih sawiin, zirna in hawn a nih dawn chuan zirlai naupang a tam thei angin vaccine hi an lak a ngai a ni, a ti. State health department chuan February 28-ah tleirawlte hi vaccine pek hman vek a tum tih a sawi bawk.