President-in Nagaland-a civil mite thahna thleng chungchang a sawilang lo : Manish Tewari

Parliament budget session ṭan ni, Thawhṭannia president Ram Nath Kovind-a'n House pahnih joint sitting hmaa thu a sawiah, Nagaland-a civil mite thah an nih chungchang leh, Covid-19 hri leng thawh hnihnaa hripui vanga thite chungchang engmah a sawi lang lo, tiin Congress senior leader Manish Tewari chuan a sawi.

"President thusawiah hian Jammu and Kashmir state nihna pek kir leh chungchang pawh sawilan a ni lo a, Afghanistan-a Taliban-ten thuneihna an chan leh, hei hian India a nghawng dante pawh sawilan a awm lo bawk," tiin Tewari chuan a sawi a ni.

Congress senior leader Malikarjun Kharge pawhin sorkar chuan kum 2014 aṭanga hlawhtlinna a lo neihte ringawt a buaipui tih sawiin, LAC-a China rawn inluling dan te, thil man sang te, hnathawh nei lo pung zelte leh tunhnaia railways-a thawk tur laknaa buaina nasa tak chhuakte pawh engmah an sawilang lo a ni, a ti. President thusawiah chuan thil ropui tak a awm lo a ni tiin a sawi.