Itanagar-ah CPA, Indian Region Zone III annual conference nei dawn

Meghalaya assembly speaker Metbah Lyngdoh chuan 18th Annual Conference of Commonwealth Parliamentary Association (CPA), India Region Zone-III chu April thla chawlhkar hnihnaah Arunachal Pradesh khawpui, Itanagar-ah neih a ni dawn tih a sawi.

Shillong-a Pinewood Hotel-a CPA Executive committee, Zone III & Executive Council, Northeast Regional Institute of Parliamentary Studies, Training and Research (NERIPSTER) ten meeting an neihah hei hi an rel a ni.

CPA India Region Zone III chairman leh Arunachal Pradesh Legislative Assembly speaker Pasang D Sona chuan Itangar-a conference nghah hi a rawt a ni. Sona hi Covid-19 hri kai avangin meeting-ah hian video conference kaltlangin a tel a ni.

Lyngdoh chuan hmarchhak state pariat-a Assembly Secretariat-te chuan hmarchhak mipuite ṭhatna tur rawtna te an siam dawn a, hei hi conference-ah sawiho a ni dawn tih a sawi. February-ah chuan sawiho tura an duh hrang hrangte hi an thehluh hman vek beisei a nih thu a sawi bawk.

Meeting-ah hian Assam speaker Biswajit Daimary, AP deputy speaker Tesam Pongte, Meghalaya deputy speaker Timothy D Shira, Nagaland sorkar hnuaia commissioner & secretary Dr PJ Anthony, Assam principal secretary Hemen Das, Arunachal Pradesh additional secretary Tadar Meena leh official dangte an tel. Tripura speaker Ratan Chakraborty chuan online hmangin a tel bawk a ni.