Prime Minister-in Sikkim airport hawng

Prime Minister Narendra Modi chuan nimin chhunah khan Sikkm-a airport hmasa ber Pakyong-ah a hawng.

Narendra Modi hian Pathian­ni tlaiah khan Sikkim hi a thleng a, Sikkim-ah hian ni hnih chhung a cham a ni. Prime Minister chuan Sikkim airport chuan inkalpawhna kawngah hmasawnna a thlen dawn tih sawiin, state mipuite pawhin ṭangkai takin an hmang thei dawn tih a sawi.

Sikkim airport siamna tur lungphum hi kum kua zet liam tawhah khan phum a ni a, nimin khan Sikkim mipuite duh­thusam chu tihhlawhtlin a ni ta a ni. Sikkim Greenfield airport lungphum hi 2009 khan phum tawh niin, cheng vaibelchhe 605 ruahman a ni a, Indo-China border aṭanga km 60 vlea hlaa awm niin Sikkim state khawpui Gangtok aṭangin km 30 vela hlaah a awm thung.

Sikkim Pakyong airport-ah hian Indian Air Force(IAF)-te chuan an thlawhtheihna an ṭumtir fo thei dawn niin an sawi a, hemi atan hian runway pangngai bakah metre 75-a thui runway dang chu runway pangngai zawmin an siam bawk a ni.

Airport hian km 1.75-a thui, metre 30-a zau runway a nei a, taxiway metre 116-a thui nei bawkin terminal building sq km. 3000 zeta zau neiin October 4 aṭangin commercial flight thlawh ṭantir a ni dawn tih Airport Direc­tor chuan a sawi.

Pakyong Airport Director R Manjunatha chuan airport chu geo technical 'cut and fill' thiamna hmanga tlang pang lehlam nawr zawl a nih thu a sawi a ni. Aiport security hi Sikkim police kutah dah a ni bawk.

Airport Director chuan Civil Aviation Ministry-a Ude Desh Ka Aam Nagrik (UDAN) scheme hnuaiah SpiceJet chuan 78-seater Bombardier Q400 flight an service tir dawn tih sawiin nitinin Delhi, Kolkata leh Guwahti thlawk a awm dawn tih a sawi bawk.

Pakyong Airport hi ram­chhunga operational airport 100-na chiah a ni.

March 5 khan IAF Dor­nier-228 aircraft chu test a lo ni tawh a, March 10-ah khan SpiceJet 78-seater Bombardier Q400 pawh ṭumtir chhin a lo ni tawh bawk.

Prime Minister in airport a hawnnaah hian Chief Minister Pawan Chamling leh Union Aviation Minister Suresh Pra­bhu-te pawh an tel a ni.

PM Modi chuan Pakyong aiport chu an engineering skills tarlangtu a nih thu a sawi a, airport siamnaa thawktu engineer leh hnathawktu dang zawng zawng chu a lawmpui thu a sawi. Kum 60 kalta khan Sikkim aṭangin thlawhtheihna te a thlawh­chhuah tawh thu sawiin kum 60 a ral leh chuan aiport a awm tawh tih a sawi a, kum li kalta chhung khan sorkar laipui minister te chuan hmarchhak an tlawh fo thu sawiin a rahchhuah chu a lang ta tih a sawi bawk.

Modi chuan Independence leh 2014 inkarah khan aiport 65 a awm thu sawiin nikum chhung ringawt khan airport pakua chu hman theiha peih hman a nih thu a sawi a ni.

Sikkim aiport hi Pakyong thingtlang khaw chung km hnih vela awm a ni a, airport huam chhung ram hi acre 201 vela zau niin sea level aṭanga ft. 4500-a sanga awm a ni bawk. Aiports Authority of India hnuaia siam a ni bawk a ni.