Journalist anga inchhala party hruaitute biaah BJP office puh

Assam Congress chuan Inrinni khan thuchhuah siamin TV news channel journalist anga inchhala an party hruaitu ṭhenkhat be tu chu an chhuizui(trace) hnuah BJP head office, Delhi aṭanga call a nih thu an sawi.

Hetihlai chuan state BJP chuan Congress puhna hi an pha thung a, BJP office-a kal reporter ṭhenkhat chuan office-a an awm lai hian phone an hman ṭhin thu leh Congress hian awmze awm loah boruak siam an tum mai mai niin an sawi ve thung.

Assam Pradesh Congress Committee (APCC) press release siamah Assam PCC general secretary leh an thupuangtu hlun tak mai Bobbeeta Sharma chu September 21 khan English news TV channel lar tak journalist nia inchhalin a rawn biak thu an tarlang. A rawn betu hian East Guwahati constituency chungchang te a rawn zawt tih an tarlang bawk a, Dispur, West Guwahati, Jalukbari, Palasbari leh Hajo constituency seat chungchang te pawh a rawn zawt nia tarlan a ni.

Sharma chuan a rawn betu chu Robin nia a insawi thu sawiin, internet-a MTNL directory aṭanga an chhuizuina aṭangin BJP office, 11 Ashoka Road Delhi a ni tih an hriat theih thu a sawi a, police hnenah complaint an thehluh dawn thu a sawi bawk.

Sharma-i chuan Assam Pradesh Congress Committee chuan BJP office chu Journalist anga inchhala midang an biak avangin an dem thu a sawi a ni.

Congress legislature party leader Debabrata Saikia, APCC Secretary Dulu Ahmed leh Assam Pradesh Mahila Congress General Secretary Bismita Gogoi-te pawhin hetiang chiah hian call an dawn thu Sharma-i chuan a sawi.

Assam BJP thupuangtu Rupam Goswami erawh chuan thil thleng chu a ngaih thutak loh thu sawiin, reporter tam tak chuan an party office aṭangin phone call an hman ṭhin thu leh hei hi a vawikhatna chauh pawh a nih a rin loh thu a sawi ve thung.

Goswami chuan Congress chu an dinhmun a chhiat zel vangin thil lian tak tak buaipui loin hetiang thil ho mai mai buaipui tawh zawk an nih thu a sawi a ni.