Railway bridge sang ber 2020-ah zo dawn

Ram chhunga railway bridge sang ber tur, Manipur-a Jiribam leh Imphal inkara siam mek chu 2020-ah zawh hman beisei a nih thu project chief engineer Sai Baba Ankala chuan a sawi.

Sai Baba Ankala chuan relkawng hi peihfel a nih hunah chuan ASEAN ramte nena insumdawn tawnna kawngah leh military ope­ration bakah tourism lamah pawh nasa takin hmasawnna a thleng thei dawn a ni, a ti.

Institution of Engineers (India), GITAM Student Chapter, GITAM Civil Engi­­neering department-a ‘Cha­llenges in Design and Construction of the World’s Tallest Bridge’ topic chung­chang a sawinaah Ankala chuan project chu kum 2008 aṭang khan ṭan a nih tawh thu sawiin national project-a puan a nih thu a sawi a, project zawh hunah hian cheng vaibelchhe 13,809 vel chu an hman a rin thu a sawi.

Indian Railways pro­ject thawhna kawngah hian IIT pathum (Kanpur, Roorkee leh Guwahati) te pawhin an thlawpna lantir nan design proof-checking te pawh an neihsak a ni.

Chief engineer chuan Jiribam-Imphal railway line chu km 111-a thui a nih thu sawiin tlang chhengchhe tak tak Patkai region velah a paltlang thu a sawi a, hmun hniam tak tak leh lui te pawh a tantlang dawn tih a sawi.

He rel kawngah hian leiverh 52 vel siam a ngai dawn a, lei 149 dawh a ngaih dawn bakah station 10 vel chu dah a ngai dawn a ni, a ti.