Hmarchhakin Road project Rs Vbch 1,90,000 dawng

Union Road and Transport Minister Nitin Gadkari chuan Thawhlehni khan hmarchhak state hrang hranga kawngpui siamna turin sorkar laipui chuan cheng vaibelchhe 1,90,000 an pe tih sawiin kawngpui km 12,000-a thui siam a nih dawn thu sawi.

Nitin Gadkari chuan sorkar laipuiin kawngpui km. 10,892-a thui siamna turin in cheng vaibelchhe 166,026 a sanction tih sawiin, hei hi hmarchhak state pariat atan a nih thu a sawi a, National Highways and Infrastructure Development Corp Ltd. hnuaiah hna hi thawh a ni dawn tih a sawi bawk.

Hemi bakah hian cheng vaibelchhe 17,257 chu state hrang hranga Public Works Department hnenah sanction a nih thu a sawi bawk a, hemi hmang hian kawngpui km. 2,421-a thui siam a ni dawn tih a sawi. National Highway Authority of India hnenah cheng vaibelchhe 7000 kawngpui siam nan an sanction tih a sawi bawk a ni.

Gadkari chuan an sorkar chuan hmarchhaka kawngpui tihchangtlun chu an ngaihpawi­mawh ber zinga mi a nih thu sawiin, a rah duhawm tak an hmuh mek thu a sawi. Union Minister chuan ram tantlang phalna, ramhnuai leh environmental clearance neihna turin state sorkarte thawhpuina an mamawh tih a sawi.

Union Transport Minister hian hmarchhaka Chief Minister-te leh Public Works Department Minister-te chu Meghalaya-ah marathon review meeting a neihpui a ni.