Assam NRC Draft list-a tel lo te insawifiah hun hawng ṭan

Assam-a National Register of Citizens (NRC) draft list-a tel lo te tan Thawhṭanni aṭang khan insawifiahna tur, claims and objections an thehluhna hun hawn ṭan a ni ta.

Assam NRC Draft list-ah hian mi nuai 40 chuang zet telh an ni lo a, September 25 aṭanga claims and objections siam hun hawn a nih hma lawk khan Assan NRC Co-ordinator rawtna thlen angin Supreme Court chuan document 15 draft list-a inziah luhna atana pawm tawh aṭangin insawifiah nan hian document 10 chiah an pawm dawn tih an lo sawi tawh a ni. Hemi anih avang hian mi tam tak chuan nasa takin an sawisel a, hmun ṭhenkhatah phei chuan insawifiah tur hian kal an tam vak lo niin an sawi.

Draft list-a tel lo awm tamna ber nia sawi Nagrik Seva Kendra (NSK)-ah pawh claims and objections thehluh tum hi an tam lo nia sawi a ni a, mi mak tih pawh a hlawh hle a ni.

Official-te chuan chawhnu dar hnih thleng pawh khan mi 15 chiah in insawifiahna hi an thehlut tih an sawi.