Guwahati-ah ni 10 chhungin Covid-19 kai 2,700 hmu chhuak

Assam state-ah hri kai an pung chak hle a, Guwahati  khawpui bikah pawh ni 10 liam ta chhung khan hri kai hmuh thar hi mi 2,700 an awm a ni. State pumah hemi hun chhung vek hian hri kai hmuh belh mi 4,945 an awm. 

State chhunga hri kai hmuh chhuah hmasa ber chu March 31 kha a ni a, nimin thleng khan hri kai hmuh tawh hi mi 11,001 an tling tawh. 

Health minister Himanta Biswa Sarma chuan Guwahati pawn lama zin chhuahna nei lo zingah hri kai hi hmuh belh zel an nih avangin mipuiah a darh tawh nia a lan thu a sawi a, tuna an dinhmun tawn mek aṭang chuan hri kai zat hi an la pun belh hle dawn niin a sawi bawk. 

Guwahati-ah hian hri kai enkawlna tur, khum 1,538 awmna hospital a awm a, health department chuan khum 3,000 awm theihna tur siam tumin hma a la mek. Hetih lai hian khawpui chhung bikah hian hri kai 2,741 hmuh an ni tawh a, Inrinni liam taa hri kai hmuh chhuah zingah mi 777 chu  khawpui chhunga mi an ni.