Assam police ten ramri-ah tharum thawh: Meghalaya CM

Meghalaya Chief Minister Conrad K. Sangama chuan Nilaini khan Assam nena an inrina hmun, West Khasi Hills-a thingtlang khuaah te Assam police-ten tharum an thawh tih a sawi.

CM Sangma chuan September 8-a thingtlang khaw mi, mi 150 insawn chhan chu Assam police-te tharum thawhna vang a nih thu sawiin Assam police-te chuan Meghalaya state chhunga kalphung awmsa chu an palzut tih a sawi a ni.

Meghalaya Assembly session neih meka Mawphlang MLA SK Sunn-an Zero Hour notice a siam a chhannaah CM Sangma chuan West Khasi Hills-a thingtlang khaw mi, mi 150 lai maiin an awmna an sawn chhan chu Assam police-ten Meghalaya state chhung inrelbawl dan an zawm loh bakah, thingtlang mite lakah tharum te an thawh vang tih a sawi. CM chuan September 8 tlai dar 4 velah khan Assam official pariat-te chu lirthei pathum hmangin Huhupara thingtlang khuaah an kal tih sawiin, Meghalaya sorkarin PMGSY scheme hnuaia kawngpui a siam te chu endikin an teh tih a sawi a ni. Assam official-te chet dan an hmuhin khaw mite ngaihdan ni lo chuan an lo dodal tih a sawi a, khaw miten Meghalaya state chin nia an lo sawi avang chuan mipuite nen chuan an inhnial zui a ni. Hemi anih avang hian loh theih lohin Assam official te chuan khua chu an chhuahsan a ngaih phah tih a sawi a ni.

Sangma chuan hemi hnu hian Assam official-te chuan Boko Police hnenah Huhupara khuaa an hna an thawh laiin Malangkona khaw mipui ten an lo tibuai tih report in case an ziaklut a ni, a ti.

Tun dinhmunah pawh state border-a cheng Malangkona mipuite chu an thla a la muang lo hle tih a sawi bawk a ni.

He thil thlenga inhnamhnawih nia hriat mi eng emaw zat chu Boko police-te hian an man nia sawi a ni a, police-te hian Malangkona area-a cheng mi eng emaw zat chu kut an thlak bawk niin CM chuan a sawi.

September 19 khan ramri-a cheng mi 600 chuan an chenna in an chhuahsan nia report a awm a, September 20-a West Khasi Hills police-ten enfiahna an neih hnuah mi 150 in an khua an chhuahsan tih an sawi ta a ni.