Nagaland-ah total lockdown a ngai rih lo : Dr Suokhrie

Nagaland principal director (PD), Helath and family welfare department Dr Vizolie Suokhrie chuan an state-ah hri kai pun belh zel mah se total lockdown puan erawh a ngai kher rih lo niin a sawi. 

Dr Suokhrie chuan hri kai hmuhte chu hmun dang aṭanga haw leh Covid Care Centre-a thawk frontline worker-te an ni a, hei vang hian tualchhungah hri a la darh lo tih a sawi. Frontline worker, Covid-19 kai hmuh tawhte contact pawh zawnchhuah vek niin, swab sample pawh test sakin an negative vek a ni, a ti. 

Hemirual hian Peren, Mon leh Kohima district-a quarantine centre-a awm mekte zinga hri kai an pun belh zel chungchang chu department chuan uluk takin thlithlai reng a ni, a ti. Kohima-ah hian frontline worker duty lai pathum chu hri kai zingah hian an tel a, anni bakah  state dang aṭanga haw paramilitary force 43 in an kai bawk. Mon district-ah pawh quarantine centre-a duty, frontline worker 12 chuan hri hi an kai bawk a ni. 

Nagaland-ah hri kai hmuh tawh hi mi 590 an tling tawh a, an zinga  231 chu enkawl dam an ni tawh a ni. Swab sample 13,805 chu RT-PCR hmangin test a ni tawh bawk. TrueNat khawl hmangin sample 7,192 test a ni tawh a, heng zinga 207 chu a posi­tive a, hengte hi RT-PCR hmangin finfiah leh a ni. Dr Suokhrie chuan an state-ah TrueNat khawl hi 29 an nei tih a sawi.