Meghalaya Tourism Department leh Facebook an thawk dun

Meghalaya Chief Minister Conrad K Sangma chuan Ningani-a World Tourism Day hmannaa thu a sawiah an state economic hmasawnna chu thil pawimawh tak a nih thu sawiin hemi kawnga hna tam ber chu entreprenuer-te kutah a awm thu a sawi.

Chief Minister Sangma chuan sorkar chuan tourism lama hmasawnna kawngah nasa takin hma a la mek tih a sawi bawk.

World Tourism Day-ah hian Meghalaya sorkar leh Facebook bakah MASH Project-te thawkte chuan Shillong-ah NGO day an buatsaih a ni.

Hemi ni pual hian civil society organisation-te tan one-day workshop buatsaih a ni a, hetah hian ṭangkai zawka Facebook hman dan te in zirtirna an nei a ni.

Ningani khan Meghalaya Tourism Department chuan Facebook nen an thawhdun zel dawn thu sawiin Chief Minister chuan tourism department chuan marketing strategy ṭha tak an mamawh tih a sawi.

Chief Minister Sangma chuan state sorkar chuan thlatin programme, ‘Entrepreneur of the month’ pawh an buatsaih dawn thu sawiin entreprenuer-te hmasawnna thlen an tum tih a sawi bawk.

Facebook leh Meghalaya Institute of Entrepreneurship (MIE) bakah Department of Tourism-te hi kumkhat chhung chu an la thawk ho zel dawn a, entreprenuer-te digital lam hawia training pek zel an tum a ni.