International drug kingpin Meghalaya-ah man

Meghalaya custom-te chuan Nilaini khan Ri Bhoi district-ah International drug kingpin manin an mi man hnen aṭang hian ruihhlo cheng vaibelchhe 19.7 man hu an man tel bawk tih an sawi.

Deputy Commissioner Custom Headquarters, Preventive Unit, North East Region-Shillong, Isaac Kharkongor chuan international drug kingpin, Letminlun Khongsai leh a driver hi Kiling thingtlang khua, Jorabat bulah an man thu a sawi a ni.

Custom official-te chuan methamphetamine tablet kg. 19.7 an man tel thu sawiin hei hi international market-ah chuan cheng vaibelchhe 19.7 man hu vel a nih thu an sawi bawk. Official-te chuan thla khat dawn an enthlaka an chhui hnuah Khongsai hi an man ta niin an sawi.

Khongsai leh a driver hi Kiling thingtlang khuaah hian in luahin an khawsa nia sawi a ni a, Bangladesh lam pan an tum mek laiin man an ni ta niin an sawi a, NDPS Act, 1985 hnuaiah thubuai thehluh a nih thu sawi a ni bawk.

Isaac Kharkongor chuan hmarchhakah hian kumtinin ruihhlo cheng vaibelchhe 15-16 inkar vel chu tawlh ruk ziah a nih thu a sawi a, Meghalaya chu ruihhlo tawlh ruk chingte tana hmun him leh hmun ralmuanga a chan mek thu a sawi.

Kharkongor chuan hmarchhak chu Golden Triangle nen inzawmna neia sawiin customs te chuan kumtina ruihhlo tam tham tak an man ṭhin chu a tlangpuiin Myanmar, Manipur, Nagaland, Assam leh Meghalaya-a West Garo Hill district aṭanga Bangaldesh tantlang tur te a nih thu a sawi. Heng state ho hi ruihhlo tawlhrukna kawng ber pakhat a ni tih a sawi bawk.

Custom DC chuan hmarchhak state sorkar tin te chuan an theihtawpin ruihhlo do beihpui thlak mah se Myanmar leh Bangladesh chu ruihhlo tawlh rukna kawng ber a nih vangin mi tam tak an man lohna chance chu a sang hle niin a sawi a ni.