Arunachal Pradesh-ah hri kai 10 hmuh belh
Arunachal Pradesh-ah nimin khan Covid-19 kai 10 hmuh chhuah belh a ni a, an zinga pathum chu Capital Complex-a mi niin; Namsai, Changlang leh Lower Subansiri district-a mi pahnih ṭheuh leh Upper Subansiri-a mi pakhat an ni.
Hri kai hmuh tharte hi state dang aṭanga haw, inkhunghrang mekte an nih thu State Surveillance Officer (SSO) L Jampa chuan a sawi. Taksa lamah harsatna nei lo vek an ni tih sawiin, an result hriat hnuah Covid Care Centre-ah dah luh nghal an ni tih a sawi bawk.
AP-ah hri kai hmuh chhuah tawh hi mi 269 an ni tawh a, an zinga 78 chu enkawl dam an ni tawh a ni. Hri kai hmuh tawh zinga 83 hi Capital Complex-a mi niin, Changlang district-ah mi 54, West Kameng-ah 21 leh Namsai-ah mi 12 an awm.
State sorkar chuan capital complex bikah hri kai hmuh belh zel an nih avangin kar liam ta nizan dar 6 aṭang khan kar khat chhung atan total lockdown a puang.