Nagaland-ah Omicron variant kai 54 awm

Nagaland-ah a vawi khatna atan Covid-19 omicron variant kai hmuhchhuah an ni tih principal secretary, health and family welfare department, Dr Neikrielie Khimiao chuan a sawi.

Dr Khimiao chuan Institute of Bioresources and Sustainable Development, Imphal-ah whole genome sequencing test turin sample 152 thawn a ni tih a sawi. Test report hi January 31 khan an dawng a, sample thawn zingah 54 chuan Omicron variant kaiin, 19 chuan Delta variant an kai tih finfiah a ni, a ti.

Omicron variant kai 54 zinga 49 hi Omicron sub variant, BA.2 kai nia sawi an ni. BA.2 hi World Health Organisation (WHO) chuan variant of concernt (VoC)-ah a la puang lo a, 'Stealth Omicron' tia hriat lar a ni. Dr Khimiao chuan genome sequencing tihna tura facility an neih ṭhat loh avangin, report pawh hi duh angin peih hma theih a ni lo tih a sawi a ni.

Nagaland health minister S Pangnyu Phom pawhin an state-ah Omicron kai 54 an awm tawh thu hi a twitter-ah a sawilang ve bawk.

Minister chuan hri darh zel tur venna tan a theih ang angin hma an la zel a, mipuite chu Covid-19 laka invenna tur kaihhruainate zawm tha a, vaccine la vek turin a ngen.

Nagaland-a Omicron variant kai zinga a tam zawk hi state pawn lama zinchhuahna nei lo an ni a, hei vang hian he variant hi an state chhunga a darh tawh nia rinna a lian hle.

Tripura-in khuahkhirhna ṭhenkhat thlahdul
Tripura sorkar chuan an state-a hri lengin ziaawm lam a pan ṭan avangin khuahkhirhna a siam ṭhenkhat chu a thlahdul ṭan a, zan lam curfew puan hun pawh a tidanglam.

State sorkarin Covid-19 kaihhruaina thar a tihchhuahah, zan lam curfew, zan dar 8 aṭanga a tuk zing dar 5 thleng hman mek chu zan dar 10 aṭanga a tuk zing dar 5 thleng ni turin a tidanglam a ni.

January 18-30 chhung khan Tripura-a Covid-19 positivity rate hi 10.72% a ni a, mahse hri kai thar hi tlahniamin, tunah chuan positivity rate hi 3.53% a ni tawh a ni.