Meghalaya miten Kulsi Dam project siam tum dodal

Meghalaya leh Assam inrina bula Assam sorkarin Kulsi Hydro-electric Dam project siam a tum chu a chhehvel thingtlang khaw hrang hrangten an duh lo.

He dam hi Meghalaya-a West Khasi Hills leh Ri Bhoi district leh Assam-a Kamrup district inrina bul, Kyrshai area-a siam tum a ni.

Kum 2019 aṭang khan he dam siam tumna chhehvela khaw 35-a chengte chuan dam siam tumna hi an lo dodal tawh a ni. February 1 khan Kyrshai-ah tualchhung mi, NGO leh hruaitute chuan he project an duh lohna hi lantir lehin, Meghalaya sorkar hnenah Khri luia dam project siam tumnaah hian No-objection Certificate (NOC) pe lo turin an ngen. He project hi siam puitlin a nih chuan a chhehvela thingtlang khaw 35 te hian an tuar dawn a, khaw tam tak chu tuiin a chim vek dawn tih an sawi.

Meghalaya leh Assam sorkar hnenah pawh mipuite duhdan ngaihthlak sak a, dam siam tumna chu titawp turin an ngen.

Meghalaya chief minister Conrad Sangma chuan detailed project report an enfiah hnuah, state sorkar chuan Kulsi dam siam tum chungchang a ngaihtuah dawn niin a lo sawi tawh a ni.