Manipur-ah bawng talhtu mi pathum man

Manipur police-te chuan Thoubal district-a Lilong area-a bawng talhtu mi pathum an man.

Pathiannia BJP-in assembly inthlan neih tura an party candidate tur a puanzar hnu lawkah heng mi pathumte hi lungawi lohna lantir nan bawng hi an talh nia sawi a ni a, an bawng talh hi BJP flag chungah an dah a ni.

Social media lama video clip darhah, bawng an talhna bula lo awm mi ṭhenkhatte chuan chief minister N Biren Singh leh Manipur unit BJP president A Sharda Devi duh lohna thute an lo aupui bawk.

Thawhṭanni khan police-te chuan bawng talhtu mi pathum - Nazbul Hussain, Abdul Rashid leh Md Arik Khan-te hi an man a, Prevention of Cruelty to Animal Act, 1960 hnuaiah thubuai siamsakin, sakhaw hrang inkara inhuatna thlentir tumah puh an ni. Hei bakah hian CM leh BJP state president tihhmingchhiat tuma puh an ni bawk a ni.

BJP candidate siamah an party hruaitu eng emaw zat an lungawi loh avangin an party an chhuahsanin party dang an zawm. Party member lungawi lote chuan state chhunga BJP office hrang hrang an bei bawk.