Assam-in February chhungin tleirawlte vaccine pek kim tum

Assam sorkar chuan tleirawl, kum 15-17 inkarte Covid-19 vaccine pek hna kalpui mek chu February thla hian pek kim hman a tum.

State nodal officer, Covid-19 vaccination, Munindra Nath Ngatey chuan state chhunga kum 15-17 inkar mi 8,81,772 hnenah Covaxin dose khatna pek an ni tawh tih a sawi. March thla laihawlah Board examination-te a awm dawn avangin, hemi hma hian tleirawlte hi vaccine pek kim vek hman an tum tih a sawi a ni.

Tleirawl zinga vaccine dose hnihna la thei chin pawh pek ṭan niin, mi 9,000 vel pek an ni tawh tih Ngatey chuan a sawi bawk. Covaxin hi dose khatna lak aṭanga ni 28 hnuah a dose hnihna hi lak theih a ni. Tleirawlte tana vaccine pek chhuah ṭan ni, January 3-a late khan January 31-ah a dose hnihna an la thei nghal a ni.

Health official chuan vaccine pek chhuah hna hi ngawrh taka kalpui a ni chungin, khaw vawt lutuk avang leh an state-a Covid hri kai thar an pun chhoh leh nasat avangin duh angin an kalpui chak thei lo tih a sawi.

Assam sorkar chuan tleirawlte hi offline board exam leh exam dangte an hmachhawn vek theihna turin a hma chuan March thla chawhma lamah tleirawl nuai 20 chin tal chu vaccine dose hnihna pek hman vek a tum tih a lo sawi tawh a ni. Nikum khan hri leng avangin board exam-te ṭhulh a ni a, kuminah erawh chuan exam hi buatsaih tum a ni a, mahse state chhunga hri kai an pun zel avangin ṭum eng emaw zat sawn hlat a ni tawh.

Chief minister Himanta Biswa Sarma chuan Pathianni khan an state-a zirna in hrang hrangte chu February thla laihawlah hawn an nih theih tawh a beisei thu a lo sawi tawh a, zirna in hrang hrangte hawn chhoh a nih dawn avangin tleirawlte vaccine pek hna pawh hi chak taka kalpui mek a ni.