Meghalaya CM-in Shillong Technology Park a hawng

Meghalaya chief minister Conrad Sangma chuan Nilaini khan 'Shillong Technology Park' a hawng. He hun hi state information technology and communication minister Hamletson Dohling leh PHE minister Renikton Lyngdoh-ten an hmanpui a ni.

Chief Minister chuan Technology Park hian khawvel ram hrang hranga Meghalaya mi, IT lama hnathawkte mahni state ngeia eizawnna kawng a hawnsak dawn a ni, a ti. "Meghalaya pawn lama ṭhalai chhuak, IT lama thawk tam takte chu an rawn kir duh ngeiin ka ring a ni. Kum 10 atana kan hmathlir neihte pawh ka lo puang tawh a, Meghalaya chu India rama state ṭha zual 10 zingah tel tir kan tum a ni. He tech park hlawhtlinna hian kan hmathlir tihhlawhtlinna tur kawnga nasa takin min pui ang," a ti.

Meghalaya-ah chuan ṭhalai, kum 35 hnuai lam chu an state mipui aṭangin 70% an tling tih sawiin, an state chuan IT sector lamah theihna sang tak a neih thu CM chuan a sawi. Technology Park building sak hna thawhnaah hian mi 1,500 chuangte tan direct-in hna thawh tur a siamsak dawn a, hei bakah indirect-in hemi zat aia a let thum vela tamin hna thawh tur an nei phah dawn bawk a ni, a ti.

Technology Park building sak thawh khatna hi zawh a ni tawh a, a senso hi state sorkarin a tum a ni. Shillong Technology Park hi public-private-partnership (PPP) model hmanga kalpui chhunzawm a ni ang.

Kum 2019 khan Tech Park hi siam ṭan a ni a, thla 25 chhungin zawhfel a ni. Company hrang hrang chuan he Tech Park-ah hian facility dah an tum thu pawh an sawi tawh bawk.