AP police leh Army-ten hnathawktu rukbote zawng mek

Arunachal Pradesh police leh Indian Army-te chuan January 31-a NSCN(K-YA) helten an rukbo, kawngsiamnaa thawktu mi pahnihte chhanchhuah tumin Longding district-a Nagaland-Myanmar border area an dap mek.

Hnathawktu rukbote hi Hiren Konch, Assam mi leh Ramashis Mahato, Bihar mi te an ni.

Longding deputy superintendent of police B Tangjang chuan, theihtawp chhuahin beihpui thlak mek mah se, rukbote awmna chin hi an la hre thei lo tih a sawi. "Nagaland lamah an hruai a, hei vang hian Nagaland-Myanmar border hi kan dap mek a ni. Indian Army (Assam Rifles) chuan min pui bawk a ni," tiin hnathawk rubotute hi NSCN (K-YA) an nih thu a sawi.

Tangjang chuan heng mi pahnihte hi sum phuta rukbo nia rin a nih thu a sawi a,mahse tun thlengin a rutute hian tlanchhuahna tura sum an phut chungchang engmah an la sawilang lo.

Tualchhung mite sawi danin, January 31 khan NSCN(K-YA) helpawl mi nia hriat, mi paruk chu Longkhaw leh Pumao khaw inkara hnathawktute camp-ah hian kalin, an zinga pathum chu Nagaland lamah an hruai lui niin an sawi. Mahse a hnuah an mi hruai zinga pakhat, Banphua Wangpan chu an chhuah a, ani hian thil thlen dan hi thuneitute hnenah a hrilh zui nghal a ni.