Hailakandi district ODF-ah puang

Assam-a Hailakandi district chu Swachh Bharat Mission (Grameen) hnuaiah pawna inthiar awm tawh lohna, open defecation free (ODF)-ah Inrinni khan district thuneituten an puang.

Hailakandi district-ah hian Swachh Bharat Mission (Grameen) hnuaiah inthiarna tur individual household latrines (IHHL) 84,614 siam a nih thu Hailakandi Deputy Commissioner Adil Khan chuan a sawi.

Hailakandi district-ah hian gaon panchayat 62 leh thingtlang khaw 331 a awm a, development block panga- Hailakandi, Lala, Katlicherra, Algapur leh South Hailakandi-te a awm a ni.

DC chuan ODF an nih theih nan chian cheng vaibel­chhe 101 vel an seng tih a sawi. An tum ber pakhat tihhlawhtlin a nih takah chuan district thuneitute chuan Swachh Bharat Mission (Urban) scheme hnuaia khaw awmte chu an tinzawn tawh dawn niin a sawi bawk. Inthiarna in siam mai bakah mipuite nundan phung chu thlak an duh thu sawiin, faina kawng inkawhhmuh zel a tum thu a sawi.

Deputy commissioner chuan public health engi­neering department (PHED)-te chu a lawmpui thu sawiin ODF an nih theihna atana an hmalakna chu fakawm a tih thu a sawi a, SBM prog­ramme an district-a a hlawh­tlin chhan chu PHED-ten theihtawpa hma an lak vang a nih thu a sawi bawk.

Executive Engineer of Public Health Engineering Department, Megha Das chuan an hlawhtlinna chhan chu an DC thawhrah a nih thu a sawi ve bawk a, an DC chu drinking water and sanitation committee chairman a nih thu a sawilang bawk a ni.