AP: ATAL Conclave-ah DoNER Minister in thu sawi Greenfield Airport siam hna ṭan thuai dawn

Union Minister of State for DoNER Dr. Jitendra Singh chuan Inrinni khan Arunachal Pradesh state khawpuia greenfield airport siam tura ruahmanna awm tawh sa chu bawhzui thuai a nih dawn thu sawiin, siam hna ṭan vat a nih tih a sawi.

Union Minister chuan hna tihkhawtlai a nih chhan, buaina awm neuh neuh chu chinfel a nih thuai a beisei thu sawiin December thla hi chuan aiport sakna tur lungphum pawh phum hman a beisei thu a sawi bawk.

Arunachal Pradesh Transformational Aspira­tional Leadership (ATAL ) Conclave-a thu a sawinaah Union Minister Jitendra Singh chuan aiport siam tura ruahmanna awm sa reng ṭan a theih loh chhan chu land acquisition a nih thu sawiin, tunah chuan hei pawh hi chinfel a nih thu a sawi a, hna pawh ṭan vat a ni dawn a ni, a ti.

Arunachal-ah chuan DoNER leh NEC hnuaiah project cheng vaibelchhe 3000 man vel kalpui mek a nih thu sawiin heng project tih changtlun lehzual nan hian cheng vaibelchhe 228 pek belh leh a ni dawn tih a sawi bawk a ni.

Jitendra Singh chuan hmarchhak chuan inkalpawhna ṭha an mamawh thu sawiin DoNER Ministry chuan hemi kawnga hmasawnna tur hian an theihtawp an chhuah tih a sawi.

Hmarchhkah theihna tam tak a awm thu sawiin sorkar hmasa khan hei hi an hre lo tih a sawi a, tuna sorkar mek hi chuan an theihtawpa hmarchhaka theihna awm hman ṭangkai an tum thu a sawi bawk.

Union Minister Singh leh Prime Minister Narendra Modi-te hian hmarchhak state hi kum li chhungin vawi 30 an tlawh hman a ni.

He hunah hian Chief Minister Pema Khandu pawhin thu sawiin DoNER kaltlanga hmarchhak hmasawnna chu Prime Minister thi ta Atal Bihari Vajpayee thawhrah a nih ve bawk thu a sawi a, PM Modi kaihhruaina hnuaia kum li lek chhunga hmarchhakin hmasawnna hrang hrang an nei chu lawmawm a tih thu a sawi bawk.

ATAL Conclave hi youth conclave a ni a, Arunachal Pradesh sorkar buatsaih niin nimin thleng khan hun hman a ni a, ṭhalai kum 18-30 inkar, mi 1000 vel an tel beisei a ni. Conclave in a tum ber chu policy siamna kawnga ṭhalai ten an idea leh an thiamna te an thawh ve a nih thu Pema Khandu chuan a sawi.