NPP MP Agatha Sangma-in AFSPA hlih phut

Meghalaya-a National People's Party (NPP) MP Agatha Sangma chuan Parliament-ah hmarchhak state hrang hranga sipai hnena thuneihna sang pekna, Armed Forces (Special Powers) Act (AFSPA) hman mek chu hlip turin a phut.

Kar liam ta Zirtawpnia Parliament-a President thusawi chungchanga Motion of Thanks sawihona neihah, Meghalaya MP hian AFSPA chungchang hi a sawichhuak a ni. He dan hlip tura a phut thu hi nikuma Parliament Winter Session-ah pawh a lo sawi tawh bawk a ni.

Sangma chuan hmarchhak state hrang hrang aiawha ding a nih thu sawiin, hmarchhak bial aṭanga he dan hi hlih a nih chuan, nikum kumtawp lama Nagaland-a thil vanduaithlak tak thleng ang kha pumpelh theih a ni dawn a ni, a ti.

Nikum December thla khan Nagaland-ah sipaiten beihpui an thlaknaah, an tihsual palh nia sawiin pawisawilo civil mi 14 an kaphlum a ni. He thil thleng vang hian Nagaland leh hmarchhak state dang ṭhenkhata AFSPA hman chuan sawisel a tawk zui nasa a, he dan hlip tura nawrtu pawh an tam hle.

Agatha Sangma chuan Khasi leh Garo ṭawng chu Constitution-a Eight Schedule-a telh a phut bawk. Meghalaya-in state puitling a nihna kum 50-na kum a nih avangin hun rei tak an lo phut tawh, Eight Schedule-a Khasi leh Garo ṭawng dah a nih chuan an state tana thil ropui leh chhinchhiah tlak anih tur thu a sawi.

Sorkar laipuiin hmarchhak biala oil palm chin a tum pawh ngaihtuah ṭha leh turin Sangma chuan a ngen bawk.

Lok Sabha-a Leader of the Congress (LoP) Adhir Rajan Chowdhary pawhin hmarchhak bial aṭanga AFSPA hlip turin a phut ve bawk a, mipui nawlpuiin he dan hi an duh lo a, he dan hlutna hi a tlahniam zel a ni, a ti. Sorkar lamin he dan hi hmang dik loin, mipuite rikrapna leh rahbehna atana hman a nih fo avangin, mipuite chuan he dan hi an dodal reng a ni, a ti.

Kum 2018 khan sorkar laipui chuan Meghalaya-a kum 27 hman a nih hnuin AFSPA hi a lo hlip tawh a, mahse hmarchhak state dang - Nagaland, Assam leh Manipur leh Arunachal Pradesh state hmun ṭhenkhata he dan hi hman chhunzawm reng a la ni thung.