Tripura panchayat bypoll-ah vote 81% tla

Pathianni-a Tripura-a Panchayati Raj Institutions 11-a bypoll neihah electorate 55,000 awm zinga 81% velin vote an thlak niin official-te chuan an sawi.

Tripura State Election Commission leh police official-te chuan northern Tripura-a buaina chhete chhuak tih loh chu vote thlakna block zawng zawngah hian buaina engmah a chhuak lo tih an sawi.

Tripura panchayat poll seat 3,386 - Gram Panchayat seat 3,207, Panchayat Samiti seat 161 leh Zilla Parishads seat 18 inchuh a inthlanna neih hun atan hian Pathianni kha ruat ni mah se block 11-ah chiah hian inthlanna hi neih a ni a, seat tam tak hi chu chuhtu dang awm loa tling sa an awm avangin vote thlak kher a ngai lo a ni.

State Election Commission (SEC) official chuan rorellai Bharatiya Janata Party (BJP) chuan seat awm zawng zawng zinga 96% chu chuhtu awm loin an lak thu a sawi.

Tripura Panchayat inthlan ṭhat hun hi political party zawng zawng deuh thaw in an sawisel a, sawn an ngiat a ni. BJP tih loh chuan inthlan hi an dodal deuh vek a, BJP thawhpui IPFT pawhin inthlan ṭhat an duh thu an lo sawi tawh a ni.

CPI-M leader Gautam Das chuan inthlanna dik leh zalen tak kalpui theih a nih loh thu sawiin block 35 awm zinga block 28-ah chuan BJP party ni lo te chu BJP thlawptu ten nomination file an phal lo tih a sawi. Hemi anih avang hian party dang zawng chuan inthlan ṭhat leh an duh tih sawi mah se state poll panel-te chuan an duhna tih puitlinsak tur hian hma an la lo niin a sawi.