Manipur University professor pali suspend

Manipur University professor pali chu an mawhphurhna hlen loa puhin suspend an ni.

Professor suspend pali zinga pathum hi September 20-a university acting vice-chancellor, K Yugindro Singh-an mi rukbo, dik lo tana mi tantir, thualthah tum thubuaia FIR a thehluhah an hming a tel ve nghe nghe.

Y Amar (economics depart­ment), N Nimai (physics), M Ranjit (mathematics) leh N Debananda (biochemistry)-te chu mawhphurhna hlen loah puh an ni a, registrar in-charge M Shyammesho chuan hming ziah hnanin suspend-na thupek hi September 29 khan sign fel ni tawh mah se Thawhṭannni khan puanzar a ni chauh a ni.

Professor suspend pali te hi Manipur University Teachers Association (MUTA) member vek an ni a, Y Amar tih loh hi chu acting VC FIR thehluhah hian an hming ziahlan vek a ni.

Hetihlai hian MUTA, Ma­ni­pur University Students’ Union (MUSU) leh Manipur University Staff Association (MUSA)-te chuan FIR hi sut leh tura ngiatin zirtirtu leh zirlai 15 lai mai man te chu chhuah an phut bawk.

September 21 zanlaiah khan security force-te chuan MU campus hi lutin zirlai 89 bakah zirtirtu paruk an man a, a hmaa buaina chhuah vanga man an nih thu an sawi a ni. Hemi zana zirtirtu man zingah hian tuna suspend te hi chu an tel lo thung. A hnu lawkah zirlai 80-te hi chu chhuah lehnghal an ni a, zirlai pakua dangte leh zirtirtute hi chu hren zui niin police te kutah an la awm a ni.

Manipur University vice-chan­cellor suspend mek AP Pandey leh University commu­nity-te inkara buaina chhuah vang hian thla li vel chu boruak a pang­ngai thei tawh lo a, a khat tawkin buaina a chhuak reng a ni.