Hmarchhak hmun hrang hrangah Gandhi piancham lawm

India ram hmun hrang hrang bakah hmarchhak state zawng zawngah Thawhlehni khan India hnam pa, Mahatama Gandhi piancham vawi 150-na lawmna neih a ni.

Assam:

Assam-ah chuan Chief Minister Sarbananda Sonowal chuan an state khawpui Guwahati-a Gandhi Mandap-ah India hnam puanzar sang ber zinga mi chu a pawtparh a, Gandhi-a chu a ngaihsan thu sawi chhunzawm nghalin Gandhi chuan tharum thawhna a pawm loh thu a sawi. Sonowal chuan faina chu Gandhi-a ngaihpawimawh a nih thu a sawi. Hruaitu ropui tak tak Nelson Mandela leh Martin Luther King-te pawhin Gandhi ngaihdan hi an zawm a ni, a ti.

Assam state sorkar official-te chuan Sonowal-a flag pawhparh hi khawpui average elevation nena teh chuan India rama sang ber a nih thu sawiin ft. 319.5-a sang a nih thu an sawi. Hetihlai hian a san zawng pangngaiah chuan ramchhungah a sang ber pathumna a nih thu an sawi.

Manipur:

Manipur-ah chuan Gandhi piancham pual hian cleanliness drive neih a ni a, he hunah hia Chief Minister N. Biren Singh pawh telin Chief Minister chuan cleanliness drive-a a tel thei chu lawmawm a tih thu a sawi a, Manipur Secretariat South Block-ah cleanliness drive hi neih a nih thu a twitter-ah a ziak a ni. CM chuan department hrang hrang official-te leh staff-ten faina kawnga beihpui an thlak chu thil hmuh nuam tak a nih thu a sawi a ni.

Arunachal Pradesh:

Arunachal Pradesh Chief Minister Pema Khandu chuan Thawhlehni-a “Swachhta Hi Seva” campaign, MG Park, Itana­gar-a neihah hun a hmanpui. India hnam pa Mahatma Gandhi pian­cham pualin MG Park-ah hian hun an hmang a ni.

Chief Minister Khandu hian Mahatma Gandhi lim bulah zahna lantir nan pangpar a dah a, hemi hnuah hian bazar hmun lama cleanliness drive neihah hun a hmanpui zui. Cleanliness drive neih zawh hian CM Khandu hian Itanagar Municipal Corporation bawlhhlawh phur truck 11 a vailiam leh bawk.

CM chuan Itanagar Municipal Corporation chu truck thar an neih avanga a lawmpui thu sawiin bawlhhlawh an phurhna kawnga IMC chu chak taka hma la zel turin a duh thu a sawi. Itanagar vawnfai leh vawn thianghlim chu chhawm nung zel tura chahin hemi kawngah hian nasa zawka inpe lehzual turin a chah a ni.

“Swachhta Hi Seva” Cam­paign hi District Administration, Capital Complex, IMC leh Urban Development & Housing department-te ṭangkawpin an buatsaih a ni.

Meghalaya:

Meghalaya Chief Minister Conrad K. Sangma chuan a twitter-ah Mahatma Gandhi inpumpekna leh hmalakna te chu fakawm a tih thu a ziak.

Sangma hi Gandhi Jayanti hun hmannaah a tel ve bawk a, Gandhi-a zahna lantirna hun hman­naah hian hun ṭha tak an hman thu sawiin society ralmuang leh fai siamna kawngah Gandhi chu entawn tlak a nih thu a sawi a ni.

Nagaland Chief Minister Neiphiu Rio, Sikkim CM Pawan Chamling leh Tripura CM Biplab Kumar Deb-te chuan an Twitter-ah MK Gandhi ideology-te chu zawm turin mipuite an chah ve bawk a ni.

Neiphiu Rio chuan Gandhi Jayanti-ah hian India hnam pa chu hriatreng a nih thu leh a ideology-te chu India mai bakah khawvel in an ngaisang reng dawn a ni, a ti.

Biplab Kumar Deb chuan Swachh Bharat kawnga nasa zawka hmalakna neihna atan Gandhi Jayanti chu hmang turin mipuite a chah ve bawk.