AR-ten Reddy Construction Company Manager rubotu man

Assam Rifle, Kadam­tala Battalion of 22 Sector, Manipur Commando-te leh Tamenglong Police Team ṭangkawp te chuan Thawhṭanni khan UTLA (SKT) hel pakhat New Kaiphundai-ah an man a, ralthuam leh silai mu an man tel bawk.

Thawhṭanni-a secu­rity force ten hel an man hi September 29-a Reddy Construction Com­pany Project Manager, Manipur-a Tamenglong district-a Vangaichungpao khuaa rubo tu zingah khan a tel ve tih tarlan a ni a, amah bakah hian midang pahnih an inhnamhnawih niin tarlan a ni bawk a ni.

Security force-ten an man hi Chungkai Singson Kuki, Mukthakal thingtlang khaw mi a nih tih an sawi a, thu an zawhfiahnaah a in hnungah ralthuam phum a nih thu a sawi a, a in hnung an enfiah hnu hian US M4 A1 Carbine pakhat, AK-47 Assault Rifle pakhat, pistol pahnih leh silai mu 113 vel an man tel niin security force-te chuan an sawi.

Thu an zawhfiahnaah hian an mi man hian amah bakah hian a ṭhiante dang pahnih nen Reddy Construction Company Manager an rukbo thu a sawi a, a ṭhiante pawh hi UTLA (SKT) hel pawl mi an nih ve ve thu a sawi bawk.

Manipur-ah hian tunhnaiah hel an man nual a, ZUF hel pali leh an Human Resources and Welfare Secretary man a nih bakah September 23 khan NSCN (K) hel pathum truck driver rubo tute chu an lo man tawh bawk a ni.