Manipur Assembly Election : Vote thlak ni sawn turin ATSUM-in Feb 10 thleng ECI hun pe

All Tribal Students’ Union Manipur (ATSUM) chuan Manipur assembly inthlan, thawh hniha neih tura vote thlak thawh khatna ni atana Pathianni ni ruat duh lo a,a ni sawn tura an ngennate tihlawhtling turin Election Commission of India chu February 10 thleng hun an pe tih an sawi.

ECI chuan Manipur assembly inthlan neih ni atan hian February 27 leh March 3 a ruat a ni. Mahse February 27 hi Pathianni a ni a, he ni hi Kristian-te tana ni pawimawh leh an ni serh a nih avangin vote thlak ni hi sawn turin state chhunga civil society leh kohhran pawl hrang hrangte chuan an ngen a ni.

ATSUM information and publicity secretary, Khaiminlen Doungel chuan vote thlak ni sawn tura ngenna siam a nih hnua tun thlenga ECI-in a la sawn duh lo chu an dem hle tih a sawi. State sorkar pawhin Manipur-a Kristian-te dinhmun leh, an duhdante a hriatthiam sak duh lo niin a puh bawk.

Punjab-ah chuan vote thlak ni sawn tura an ngenna chu state sorkar lamin a nawrpui a, mahse Manipur sorkar erawh chuan an ngenna hi ECI lamah a nawrpui ṭha ve lo niin ATSUM chuan an sawi.

ECI-in civil society organisation leh kohhran pawl hrang hrangte ngenna hi February 10 thlenga a tihhlawhtlin sak lo a nih chuan, ATSUM chuan a ṭul angin hma an la ang a, inthlan neih tur boruak thlengin a nghawng thei dawn niin an vau a ni.