Tripura sorkarin Lata Mangeshkar hmingin Cultural Award siam tum

Tripura chief minister Biplab Kumar Deb chuan Pathiannia boral ta, zaithiam Lata Mangeshkar hming chawiin an state-in cultural award siam a tum tih a sawi.

Agartala-a a chenna ina Pathianni tlaia chanchinthar lakhawmtute a kawmna­ah, CM Deb chuan hemi chungchanga thutlukna hi amah mai chuan a siam thei lo tih sawiin, cultural affairs deparment lamin a ngaihtuah zui tur thu a sawi. Sawiho a nih hnuah state cabinet chuan thutlukna a siam dawn a ni, a ti.

Legendary singer Lata Mangeshkar hi kum 92 mi niin Pathianni khan Mumbai-ah a thi a, state chawimawina famkim nen vui a ni. Indian playback singer lar ber nia sawi a ni a, Nightingate of India tia vuah a ni. Chawimawina hrang hrang pawh a dawng hnem hle a, heng zingah hian Padma Bhusan (1969), Maharshtra Bhusan (1997) leh Bharat Ratna (2001) te a tel.