Tripura BJP MLA 2 bang, Congress party zawm an tum

Tripura-a rorellai party, BJP MLA pahnih - Sudip Roy Barman leh Ashish Kumar Saha te chuan MLA aṭanga banna an thehlut a, Congress party an zawm dawn nia sawi a ni.

Ashish Kumar Saha chuan Assembly speaker hnenah banna lehkha hi an thehlut a, ani pawhin alo pawmsak nghal tih a sawi. BJP member an nihna aṭang pawhin an bang nghal tih sawiin, state BJP president hnenah pawh banna lehkha hi an thawn a, a lo pawmsak ngei an beisei thu a sawi.

Saha chuan, Delhi-ah an kal leh phawt dawn a, an haw hunah an banna chhan hi chiang takin an sawichhuak dawn tih a sawi bawk. Delhi-a Congress party hruaitu Rahul Gandhi an hmu dawn nia sawi chungchang erawh an sawichiang duh lo.

Roy barman chuan, "Mipuite tana politics khel kan ni, mipuite tawrhna leh natna hi kan hmu reng thei tawh lo a ni. Chhan tam tak avangin mipuite chuan zalen takin thil an ti thei tawh lo a,democracy hi dinhmun derthawng takah a awm mek. Mi pakhat rorelna hnuaiah kan awm a, minister-te chuan engmah an ti thei tawh lo a ni," a ti. Officer tlemte leh ram hruaitu ṭhenkhat chuan an duh duh an tih theih laiin, sorkar chuan mipuite harsatna leh tawrhna chu a ngaihven sak lo tih a sawi. "Hetianga dik lo taka rorelna hi kan pawm thei tawh lo a, hei vang hian BJP aṭanga inlakhran hi kan tum ta a ni,"tiin a sawi.

Tripura chief minister Biplab Kumar Deb kaihhruai BJP-IPFT sorkarah Royman Barman hi health minister-ah dah a lo ni tawh a, mahse kum 2019-a Lok Sabha inthlanpui neih hnu lawk khan state sorkar sawiselna hawia thu sawi avangin minister a nihna aṭang hian ban a ni. Kum 2016 khan Congress party aṭangin Trinamool Congress a zawm a, a hnu kum khat lekah MLA ṭhenkhatte nen BJP hi an zawm leh a ni.

Nikum August thla khan BJP MLA panga - Sudip Roy Barman, Ashish Kumar Saha, Burbamohan Tripura, Dibachandra Hrangkhawl leh Asish Das-te chuan meeting buatsaihin, state BJP siamṭhat dan tur chungchanga central lama hruaitute nena rawtna an thlen a ni. Hemi hnu hian central lama BJP hruaitu eng emaw zat chuan Tripura hi tlawhin, an party dinhmunte an thlir ho a ni.