Nagaland-a thingtlang khua zawng zawng ODF-ah puang

Nagaland Public Health Engineering (PHE) Minister Jacob Zhimomi chuan Nilaini-a Swachhata Diwas hun hmannaah Nagaland a thingtlang khua zawng zawng chu pawn lama inthiar awm lohna, Open Defecation Free (ODF)-ah a puang.

Minister chuan an state chhunga thingtlang khaw awm zawng zawng, khaw 1,122 zet chu ODF-a puan an nih thu sawiin, khawpui lam erawh hei hian a huam lo tih a sawi. Zhimomi chuan Urban Development Department-te pawh PHED nen an ṭangkawp dawn tih sawiin, khawpui lam pawh ODF-a puan an nih thuai theih nan hma an la dawn tih a sawi a ni.

PHE Minister chuan nakkum October 2-a lo thlen leh hunah chuan Nagaland pumpui chu ODF-a puan theih a beisei thu a sawi.

Minister hian thingtlang khaw 112 hnenah faina kawnga an thawh ṭhat avangin lawmman a hlan bawk a ni.