Rafale fighter jet ; Hmarchhak tan ṭangkai dawn : EAC Air Officer CIC

Indian Air Force chuan nakkum September thla khi chuan Rafale fighter jet an neih hman tawh an beisei. He fighter jet chungchangah hian eptu lam chuan nasa takin thu inhnialna awm thei tak tak an sawichhuah mek laiin, Air Officer Commanding-in-Chief, Eastern Air Command, Air Marshal R Nambiar chuan Inrinni khan Rafale fighter jet chu hmarchhak tan a ṭangkai hle dawn niin a sawi.

Air Marshal R Nambiar chuan nakkum September thlaah chuan Indian Air Fore chuan Rafale jet chu an neih hman tawh dawn thu a sawi a, Rafale chu jet ṭha tak a nih thu sawiin ṭangkai taka hman theih a nih thu a sawi a, game a thlak hlawk thei dawn niin a sawi a ni.

AIR FEST 2018 ni hnih awh, Advance Landing Ground (ALG) Upper Shillong, Meghalaya-a neihah Inrinni khan Air Officer Commanding-in-Chief hian media te hmaah Rafale chuan hmarchhak security a tihchak dawn thu a sawi a, thil an la tih theih ngai lo te pawh a tihtir thei dawn tih a sawi. IAF base 30% chu hmarchhaka awm a nih thu sawiin heta ṭang hian hmarchhak tana a ṭangkaina tur chu a chhut thiam theih a ni, a ti.

Fighter jet thar tur te hi IAF Hasimara Air Force Station, Indo-Bhutan border, Alipurduar district, West Bengal-ah dah a ni dawn tih a sawi bawk.

Air Marshal chuan hmar­chhaka an unit zawng zawng chu tunlai thiamna thar ber ber hmanga thuamṭhat vek a nih thu sawiin Rafale pawh an dawl zo dawn a ni, a ti bawk a ni.