AP leh Nagaland in tuialhthei man tihniam

Arunachal Pradesh leh Na­galand chuan an state chhungah petrol leh diesel man an tihniam.

Arunachal Pradesh sorkar chuan thuchhuah siamin tui­alhthei mana an state VAT tihniamin petrol leh diesel man chu litre khatah cheng 2.5 ve ve in an tihniam tih an sawi.

Arunachal sorkar official te chuan sorkar laipui thupek zawmin VAT hi an tihhniam thu an sawi a, kar kalta Ningani zanlai aṭang khan hmanṭan a nih thu an sawi a ni.

Chief Minister Office thu­chhuah siam chuan tuialhthei man tihhniam a nih chhan chu mipui vantlang ten harsatna an tawh tihziaawm nan a nih thu a tarlang. CMO thuchhuah chuan an state VAT an tihtlem aṭangin petrol leh diesel man hi an tihhniam thu a sawi a, state revenue chuan tuar dawn mah se mipuite harsatna tawh an sut­kianna tur a nih thu an tarlang bawk.

Nagaland pawhin petrol leh diesel man hi cheng 2.50 ve ve in a tihniam ve bawk a, Chief Minister Neiphiu Rio chuan a twitter-ah sorkar laipui thuchhuah zawmin petrol leh diesel man cheng 2.50 ve vea an tihhniam thu a ziak.

Report ṭhenkhat chuan kar hmasa khan Nagaland hmun ṭhenkhatah chuan petrol hi litre khatah cheng 81.70 man a tling hman niin an tarlang a ni.

Kar liamta Ningani khan sorkar laipui chuan petrol leh diesel man cheng 2.50-a tihniam turin thupek a tichhuak a, excise duty-ah cheng 1.50 tihniam turin leh oil company cheng 1-a tihniam turin an ti bawk a ni.

Finance Minister Arun Jaitley chuan excies duty aṭanga pawisa lak tihhniam vang hian sorkar laipui tax revenue chu cheng vaibelchhe 10, 500 laiin a nghawng dawn tih a lo sawi tawh a ni.

Delhi-ah chuan petrol hi litre khat cheng 84 a kaichho tawh a, diesel man pawh litre khatah cheng 74.45 a kaichho tawh bawk.