Assam NRC a hlawhtlin chuan Tripura in an kalpui ve dawn

Tripura Chief Minister Biplab Kumar Deb chuan Assam in an kalpui mek National Register of Citizens (NRC) chu a hlawhtlin chuan Tripura-ah pawh kalpui a ni ve dawn tih an sawi.

Biplab Kumar Deb chuan Assam-a thilthlen dan chu mi zawng zawngin ngun takin an thlir mek tih a sawi a, sorkar laipui leh Supreme Court meuh pawhin uluk takin an thlithlai reng tih a sawi. Assam hian final list an siam hnuah an hlawhtlin viau chuan an state pawhin an kalpui ve nghal dawn tih a sawi bawk.

Deb chuan sorkar laipuiin NRC kalpui tur dan a pawm a nih chuan an state chuan an zawm nghal dawn tih a sawi bawk.

Assam NRC kalpui mek hi Supreme Court chuan a endik sak reng a ni.

July 30-a Assam in NRC Draft list an tlangzarhah khan mi nuai 40 chuang an tel lo a, NRC hi India khua leh tui dik tak enfiahna tura kalpui a ni.

Kar liamta Ningani khan Indigenous Na­tionalist Party of Tripura chuan an party president Bijoy Kumar Hrangkhawl kaihhruaina hnuaiah Home Minister Rajnath Singh hmu in NRC kalpui ve hi an ngiat a ni. Union Minister hian engmah a lo tiam lo nia tarlan a ni thung.

Tripura indegenous community-te hian an state-a NRC kalpui hi an ngiat nasa tawh hle a, kawngzawh te an lo huaihawt fo tawh nghe nghe a ni.