Assam-in Feb15 aṭangin Covid khuahkhirhna siamte titawp vek dawn

Assam sorkar chuan Covid-19 hri leng vanga khuahkhirhna a siam hrang hrangte chu February 15 aṭangin titawp vek a tum. Zan lam curfew pawh hlih a ni tawh ang.

Zirna in hrang hrang, primary aṭanga secondary level bakah a chunglamte pawh February thla laihawl aṭangin hawn vek an ni dawn a, mall-te pawh khuahkhirhna awm loa hawn phalsak an ni tawh ang a, cinema hall-ah pawh 100% capacity awm phal a ni ang. Hemi rual hian Covid vaccine dose kima la vek an ni tawh tur a ni tih a ni thung a, face mask leh sanitiser-te pawh ṭha taka hmang chhunzawm zel turin tih an ni.

Chief minister Himanta Biswa Sarma chuan state chhunga hri leng dinhmunin ziaawm lam a pan chhoh zel avangin khuahkhirhna tihtawp hi an rel tih a sawi a, "February thla laihawlah chuan nunphung pawh a pangngai chhoh ṭan tawh kan beisei a ni. Thla tharah HSLC leh HS exam neih a ni dawn a, April thlaah Bohag Bihu festival neih a ni bawk ang. Mipuite chu vaccine la vek tur leh, precautionary dose la thei chin pawh la vek turin ka ngen a ni," a ti.