Nagaland : Konyak CSO, Assam Rifle leh Mon district aiawhten inbiakna nei

Nagaland-a nikum December 4-5-a sipaiten Mon district-a civil mi an kahhlum chungchangah, Konyak civil society organisation (CSO), Assam Rifles (AR) leh Mon district thuneitute chuan Thawhṭanni khan inbiak thawh khatna an nei.

Mon-a DC Conference hall-ah round table talk vawi khatna hi neih a ni a, CSO aṭang hian Konyak Union (KU), Konyak Nyupuh Sheko Khong (KNSK) leh Konyak Students' Union (KSU) an tel.

Assam Rifles team-ah hian Major General Vivskhas Lakhre, SM, IGAR North; Brigadier Chatterjee of 7 Sector Tuensang; 27 AR Mon commanding officer Rippon Bora leh Lieutenant Colonel Atong Konyak-te an tel. Meeting hi Mon district deputy commissioner Thavaselan K chuan a kaihruai a ni.

KSU chuan pawisawi lo civil mite thah an nih chungchanga an thil phut chu a la ngai reng tih sawiin, he inthahna thlenga inhnamhnawih sipai officer leh jawan-te chu civil court-ah thubuai siamsak a, an phu ang hremna pek ngei an phut. CSO lam hian civil mite chenna bial chhunga Army camp awm zawng zawngte chu a rang thei anga bera insawnchhuak turin an phut a, hei bakah Armed Forces (Special Powers) Act (AFSPA), 1958 hlih an phut thu an sawinawn leh bawk.

AR team lam hian nikum December 5 aṭang khan Konyak hnam chenna bialah armed force tei vel leh patrolling neih ṭhin pawh tihtawp vek a nih tih sawiin, pawikhawihtute laka dik taka ro rel a nih theihna tura theihtawp an chhuah tur thu an sawi bawk a ni.