Guwahati Police-te'n dan loa kuhva tawlhrutu man

Guwahati Police Crime Branch chuan dan loa Myanmar aṭanga kuhva rah tawlhruknaa a khaipa zinga mi nia sawi, Bidyut Sinha chu Gotanagar-a Krishna Nagar-ah an man tih an sawi.

Guwahati Police commissioner Harmeet Singh chuan January 25-a Crime Branch-in Bidyut Sinha laka thubuai a ziahluh hnuah, chief minister Himanta Biswa Sarma-an Assam-a dan loa kuhva ro leh thil dang lakluh tumna dangchat tura ham la zel tura a hriattir angin, Sinha hi man a ni tih a sawi a ni.

Singh chuan Myanmar kuhva hi Mizoram-Barak Valley route (Vairengte-Lailapur route) kaltlanga lakluh a nih thu sawiin, Meghalaya leh ram chhung hmun dangahte phurh chhuah leh a ni, a ti. Sinha thu an zawhfiahnaah, kuhva tawlhnaah hian Assam pawn lam mi eng emaw zat inhnamhnawih an awm thu pawh a sawi.

Kuhva tawlhruknaah hian junior-level police mi leh sa pawh inhnamhnawih an awm nia a lan thu Singh chuan sawiin, Barak Valley-a police official 10-te chu thu zawhfiah tura koh an ni, a ti. Police official an koh zingah hian Dholai Police Station, Rangikhari OP, Ghongoor OP, National Highway PP, Tarapur TOP, Arunachal OP, Bhangapar OP, Bihara OP, Gumrah PIC leh Palonghat OP-a officer-in-charge te an tel. Dan kalha kuhva lakluhnaah police official-te hi an inhnamhnawih tih finfiahna a awm chuan an chungah na taka action lak a nih tur thu a sawi nghal bawk.

Singh chuan an state chhunga kuhva tawlhruknaa inhnamhnawih, state dang mi an awm a nih pawhin an umzui zel dawn tih a sawi. He thil hi inter-state crime chauh ni lo, international crime a nih thu a sawi bawk a ni.