AP khawpui Itanagar-ah RBI sub-office hawng dawn

Arunachal Pradesh khawpui, Itanagar-ah Reserve Bank of India (RBI) sub-office dah a ni dawn a, India rama RBI sub-office dahna khawpui 32-na a ni ang.

Itanagar-a RBI sub-office hi kumin chawhnu lamah hawn hman beisei a ni.

Deputy chief minister Chowna Mein chuan Thawhṭanni khan office hawn tur chungchang hi RBI North Eastern Region regional director Sanjeev Singha leh bank official dangte a chenna inah a sawipui a ni. Mein chuan bank-in tluang tak leh ṭha taka hna a thawh theihna turin state sorkarin chuan a theihna ang apiangah a thawhpui tur thu a hrilh.

Official-te chuan RBI sub-office atan hian Chimpu bula building luah tur pawh tihfel a nih tawh thu an sawi. Building hi cheiṭhat mek niin, zawhfel a nih veleh a function nghal dawn tih an sawi bawk.

India central bank leh regulatory body, RBI hian ram chhunga khawpui 31-ah office a nei tawh a, hmarchhak state paruk - Assam, Sikkim, Meghalaya, Tripura, Mizoram leh Manipur khawpuiah pawh sub-office hi a nei tawh a ni.