Positivity rate 5.02%-ah tla thla

India ramah Covid-19 hri kai thar an tlahniam hle a, Thawhṭanni khan hri kai hmuh chhuah thar, positivity rate chu 5.02%-ah a tla thla. Kar khata hri kai hmuh chhuah, weekly positivity rate pawh 8.30% a ni tawh.

Union health ministry-in nimina data a tichhuahah, Thawhṭanni khan ram pumah hri kai thar mi 67,597 awmin, Covid-19 thihpui 1,188 an awm thung. India ramah Covid vanga thi hi mi 5,04,062 an awm tawh a, hei hi hri kai hmuhchhuah tawh aṭanga 1.19% a ni.

Hripui vanga thi zingah hian Maharashtra state mi 1,43,098 awmin, Kerala-ah 59,115, Karnataka-ah 39,396, Tamil Nadu-ah 37,772, Delhi-ah 25,998, Uttar Pradesh-ah 23,330 leh West Bengal-ah 20,852 an awm tawh bawk.

Hri kai mek, active case pawh hri kai tawh aṭanga 2.35% ah tla hniamin, mi 9,94,891 in hri hi an vei mek. Hri kai enkawl dam, recovery rate pawhin hma a sawn leh tawh a, 96.46% ah a kai chho.